ஓய்வு பெறுவதற்காக வெளியிடப்பட்ட வர்த்தமானி அறிவித்தலுக்கு எதிராக நீதிமன்றத்தில் ரிட் மனு தாக்கல்!
Hizam A Bawa
1 min read
இரத்தினபுரி போதனா வைத்தியசாலையில் கடமையாற்றும் 13 விசேட வைத்திய நிபுணர்கள் மற்றும் வைத்திய உத்தியோகத்தர்கள் ஓய்வு பெறும் திகதியை அறிவித்து கடிதங்கள் வழங்கப்பட்டுள்ளன.
இதன்படி, குறித்த மருத்துவமனையின் இயக்குநர் வைத்தியர் எம்.டி.ஏ. ரோட்ரிக் மூலம் ஜூலை 01 ஆம் திகதியில் இருந்து, மூன்று சிறப்பு மருத்துவர்கள் மற்றும் மூன்று வைத்தியர்களும் ஓய்வு பெற வேண்டும் எனவும் தெரிவிக்கப்பட்டுள்ளது.
அத்தோடு மற்ற நான்கு சிறப்பு மருத்துவர்கள் மற்றும் 3 வைத்தியர்களும் அடுத்த ஆண்டு ஜனவரி 1ஆம் திகதி முதல் ஓய்வு பெற உள்ளதாக இலக்கம் 2310Ra7 – 12 டிசம்பர் 2022 திகதியிட்ட சிறப்பு வர்த்தமானியின்படி, சம்பந்தப்பட்ட 13 நிபுணர்கள் மற்றும் மருத்துவர்களின் ஓய்வு குறித்து கடிதங்கள் வெளியிடப்பட்டுள்ளன.
எவ்வாறாயினும், அரச ஊழியர்களுக்கு 60 வயது பூர்த்தியாகி ஓய்வு பெறுவதற்காக வெளியிடப்பட்ட வர்த்தமானி அறிவித்தலுக்கு எதிராக 176 மருத்துவ நிபுணர்கள் அண்மையில் மேன்முறையீட்டு நீதிமன்றில் ரிட் மனுவொன்றை தாக்கல் செய்திருந்தனர்.
மேலும், அக்டோபர் 17ஆம் திகதியன்று நடைபெற்ற அமைச்சரவைக் கூட்டத்தில் 60 வயதிற்குட்பட்ட சிறப்பு மருத்துவர்களுக்கு கட்டாய ஓய்வு அளிக்க முடிவு செய்யப்பட்டுள்ளதாக மனுதாரர் நிபுணர்கள் தெரிவித்துள்ளதோடு இது ஒரு தன்னிச்சையான மற்றும் நியாயமற்ற முடிவு என்றும் சுட்டிக்காட்டிய அவர்கள், நிபுணர்கள் குறைந்தபட்சம் 63 வயது வரை சேவை செய்வதற்கான வாய்ப்பைப் பெற வேண்டும் எனவும் தெரிவித்துள்ளனர்.
