இலங்கையின் வேகமாக குறைந்து வரும் பிறப்பு விகிதமானது, எதிர்காலத்தில் நாட்டின் அன்றாட செயல்பாடுகளை நடத்துவதற்குத் தேவையான இளம் தொழிலாளர்களின் கடுமையான பற்றாக்குறைக்கு வழிவகுக்கும் என்று இன்று (10) பாராளுமன்றத்தில் நடைபெற்ற அமர்வின் போது நாடாளுமன்ற உறுப்பினர் அஜித் பி. பெரேரா தெரிவித்துள்ளார்.

எனவே, அதிக குழந்தைகளைப் பெற்றுக்கொள்வதை மதித்து ஊக்குவிக்கும் ஒரு திட்டம் நாட்டில் உடனடியாக நிறுவப்பட வேண்டும் என்றும் அவர் வலியுறுத்தினார்.

பிறப்பு விகிதங்கள் குறைவதற்கான காரணங்களில், திருமண வயது அதிகரிப்பு மற்றும் திருமண விகிதத்தில் ஏற்படும் சரிவு, விவாகரத்துகள் மற்றும் பிரிவினைகளின் எண்ணிக்கை அதிகரிப்பு, அதிக வாழ்க்கைச் செலவு மற்றும் பொருளாதாரத்தில் நிலவும் நிச்சயமற்ற தன்மை, குழந்தைகளை வளர்ப்பது ஒரு செலவு மிகுந்த செயல் என்ற சமூகத்தின் கருத்து, கோவிட் பெருந்தொற்றால் ஏற்பட்ட அதிர்ச்சி மற்றும் இளைஞர்கள் பெருமளவில் நாட்டை விட்டு வெளியேறுதல் ஆகியவை அடங்கும் என்று அவர் சுட்டிக்காட்டினார்.

இதற்குத் தீர்வாக, மகப்பேறு மற்றும் தந்தைவழி விடுப்புப் பலன்களை அதிகரிப்பது, மற்றும் குழந்தை பராமரிப்பு சேவைகள் மற்றும் ஆரம்பகால குழந்தைப் பருவ வளர்ச்சி சேவைகளின் செலவைக் குறைப்பதற்காக அரசாங்கம் ஒரு குறிப்பிட்ட திட்டத்தை உருவாக்குவது உள்ளிட்ட பல வழிகளை அவர் சுட்டிக்காட்டினார்.

அவர் மேலும் கூறுகையில்;

"33,0000 தொடக்கம் 36,0000 வரையான எண்ணிக்கையானது உகந்த வருடாந்திர பிறப்பு விகிதமாகக் கருதலாம். இன்று இது இரண்டு இலட்சமாகக் குறைந்துள்ளது...

இந்த நாட்டில் குழந்தைகள் பிறக்கவில்லை என்றால், போதுமான பிறப்பு விகிதங்கள் இல்லை என்றால், இந்த நாட்டில் ஏற்கனவே உள்ள பத்தாயிரம் பாடசாலைகளுக்குப் போதுமான குழந்தைகள் இல்லை என்றால், நாம் ஏற்கனவே கட்டியெழுப்பியுள்ள பல்கலைக்கழக அமைப்பின் திறனை ஈடுசெய்யப் போதுமான குழந்தைகள் முன்வரவில்லை என்றால், அங்கே ஒரு பெரிய பிரச்சனை இருக்கிறது. இன்று, பல்கலைக்கழகங்கள், குறிப்பாகப் பொது அறிவியல் துறைகளில், பட்டப்படிப்புகளுக்கும் இளங்கலைப் பட்டங்களுக்கும் போதுமான மாணவர்களைச் சேர்ப்பதில்லை.

இது மிகவும் தீவிரமான ஒரு பிரச்சனை. இதைப் பற்றி நாம் என்ன செய்ய முடியும்? இதற்காக, குழந்தைகளைச் சார்ந்திருக்கும் குடும்பங்களுக்கு வரிச் சலுகைகள் அல்லது வருமான வரி விலக்குகள் அளிக்கப்பட வேண்டும். குழந்தைகளைக் கொண்ட குடும்பங்களுக்குச் சிறப்பு கவனம் அளிக்கப்பட வேண்டும். நாம் அவர்களைப் பாதுகாக்க வேண்டும். மேலும், தகுதியான குடும்பங்களுக்குப் பிறப்பின்போது நிதியுதவியும் மானியங்களும் வழங்கப்பட வேண்டும். உலகில் இதுபோன்ற பிரச்சனைகளை எதிர்கொள்ளும்போது நாடுகள் பின்பற்றிய ஒரு முறை இதுவாகும்.

மேலும், மகப்பேறு மற்றும் தந்தைவழி விடுப்புப் பலன்களை அதிகரிக்க வேண்டும். தாய் மற்றும் தந்தை இருவருக்கும் வழங்கப்பட வேண்டும். விடுப்பு வழங்கப்பட வேண்டும். குழந்தைகள் ஊக்குவிக்கப்பட வேண்டும். ஒரு குழந்தை பிறக்கும்போது எழும் சவால்களை எதிர்கொள்ள அரசாங்கத்திற்கு அதிகாரம் அளிக்கப்பட வேண்டும். குழந்தை பராமரிப்பு சேவைகள் மற்றும் ஆரம்பகால குழந்தை வளர்ச்சி சேவைகளின் செலவைக் குறைக்க அரசாங்கம் ஒரு சிறப்புத் திட்டத்தைத் தயாரிக்க வேண்டும்.

மேலும், இளம் குடும்பங்களுக்கு வீட்டு உதவித் திட்டங்கள் அல்லது மானிய விலையில் வீட்டுக் கடன் வசதிகள் வழங்கப்பட வேண்டும். அதாவது, அதிக குழந்தைகள் இருக்கும்போது கடன்களுக்கான வட்டி குறைக்கப்பட வேண்டும். மானியங்கள் வழங்கப்பட வேண்டும்.

மேலும், இளம் தம்பதிகளுக்கு, குறிப்பாகக் குழந்தைகளைப் பெற்றெடுக்கும் குடும்பங்களுக்கு இந்தப் பாதுகாப்பு வழங்கப்பட வேண்டும். அதிக குழந்தைகளைப் பெற்றுக்கொள்வது பாராட்டப்பட வேண்டிய, ஊக்குவிக்கப்பட வேண்டிய, விருது வழங்கப்பட வேண்டிய மற்றும் போற்றப்பட வேண்டிய ஒன்றாக மாற்றப்பட வேண்டும் என்றும் நாடாளுமன்ற உறுப்பினர் அஜித் பி. பெரேரா தெரிவித்தார்.