ஊழல் குற்றச்சாட்டுகளை எதிர்கொண்டுள்ள முன்னாள் அமைச்சர் எஸ்.எம். சந்திரசேனவைப் பிணையில் விடுவிக்குமாறு கொழும்பு உயர் நீதிமன்றம் நேற்று (02) உத்தரவிட்டது.

அதன்படி, குற்றம் சாட்டப்பட்டவரை 50,000 ரூபாய் ரொக்கப் பிணை மற்றும் தலா 1 மில்லியன் ரூபா மதிப்புள்ள இரண்டு பிணைதாரர்கள் மூலம் விடுவிக்குமாறு நீதிபதி உத்தரவிட்டார்.

பின்னர், குறித்த வழக்கை ஜூலை 22 அன்று மீண்டும் விசாரணைக்கு எடுத்துக்கொள்ளுமாறு கொழும்பு உயர் நீதிமன்றம் உத்தரவிட்டது.

இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழு தாக்கல் செய்த குற்றப்பத்திரிக்கை, கொழும்பு உயர் நீதிமன்ற நீதிபதி ரவீந்திர பிரேமரத்ன முன்னிலையில் குற்றம் சாட்டப்பட்ட முன்னாள் அமைச்சரிடம் நேற்று ஒப்படைக்கப்பட்ட பின்னர் இந்தப் பிணை உத்தரவு பிறப்பிக்கப்பட்டது.

2014 ஜனவரி 1 முதல் டிசம்பர் 31 வரையிலான காலகட்டத்தில், அப்போதைய ஜனாதிபதித் தேர்தலின்போது அரசியல் ஆதாயம் பெறும் நோக்கத்தில், அனுராதபுரம் மாவட்டத்தில் உள்ள குறைந்த வருமானம் கொண்ட விவசாயிகளுக்கு மானிய விலையில் விநியோகிப்பதற்காக அரச நிதியில் இறக்குமதி செய்யப்பட்ட 36,000 கிலோகிராம் மக்காச்சோள விதைகளைத் தனது நண்பர்களுக்குப் பகிர்ந்தளித்ததாக அவர் மீது குற்றம் சாட்டப்பட்டது.

மாவட்டச் செயலகத்தின் திட்ட இயக்குநர் உள்ளிட்ட செல்வாக்கு மிக்க அதிகாரிகளைக் கொண்டு மேற்கொள்ளப்பட்ட இந்தச் செயலின் மூலம் ஊழல் குற்றம் இழைக்கப்பட்டுள்ளது என்று தெரிவித்து, முன்னாள் அமைச்சருக்கு எதிராக இலஞ்ச ஆணையம் இந்த வழக்குப் பதிவு செய்துள்ளது.