தேர்தல்களின் போது வாக்காளர்களின் விரல்களில் அழியாத மை இடும் நடைமுறையை நிறுத்தும் முடிவு, ஒவ்வொரு தேர்தலுக்கும் சுமார் 10 கோடி ரூபாய் பொதுப் பணத்தைச் சேமிக்கும் என்று பஃவ்ரல அமைப்பின் நிறைவேற்று பணிப்பாளர் ரோஹன ஹெட்டியாராச்சி தெரிவித்துள்ளார்.

நேற்று (24) நடைபெற்ற செய்தியாளர் சந்திப்பில் பங்கேற்ற அவர், இந்த நடவடிக்கை ஒரு நேர்மறையானது என்றும், இது குறித்து தேர்தல் சம்பந்தப்பட்டவர்கள், அரசியல் கட்சிகள் மற்றும் சிவில் சமூக அமைப்புகளிடையே பல ஆண்டுகளாக விவாதிக்கப்பட்டு வருகிறது எனவும் அவர் குறிப்பிட்டுள்ளார்.

கட்டாய தேசிய அடையாள அட்டை மற்றும் வாக்காளர் பட்டியல்களைத் தயாரிப்பதில் நவீன தொழில்நுட்பத்தைப் பயன்படுத்துவதால், வாக்காளர்களைச் சரிபார்க்கும் செயல்முறை வலுப்பெற்றுள்ளது என்று அவர் சுட்டிக்காட்டினார்.

மேலும், இதன் காரணமாக, வேறொருவர் போல் நடித்து கள்ள வாக்குகளைப் போடுவதற்கான வாய்ப்பு பெருமளவில் குறைந்துள்ளது என்றும் அவர் தெரிவித்தார்.

தற்போதைய தேர்தல் முறையில் தேர்தல் மோசடிக்கு எதிரான பாதுகாப்பு ஏற்பாடுகள் மிகவும் மேம்பட்டுள்ளதால், நீண்ட காலமாக இருந்து வந்த அழியாத மை பயன்படுத்தும் இந்த முறையின் தேவை இப்போது இல்லாமல் போய்விட்டது என்றும் ரோஹன ஹெட்டியாராச்சி வலியுறுத்தினார்.