அரசுச் சேவையின் மனிதவள நிர்வாகத்தைப் புதுப்பித்து, டிஜிட்டல் தொழில்நுட்பத்தின் ஊடாக முறைப்படுத்தும் திட்டமாக 'GovHR' கணினி அமைப்பு முறைமையாகத் தொடங்கி வைக்கப்பட்டுள்ளது.

பொது நிர்வாக, மாகாண சபைகள் மற்றும் உள்ளூராட்சி மன்ற அமைச்சர் பேராசிரியர் சந்தன அபயரத்னவின் தலைமையில் இந்நிகழ்வு இடம்பெற்றது.

சமீபத்தில் தொடங்கி வைக்கப்பட்ட இக்கணினி அமைப்பின் மூலம் அரசு நிறுவனங்களில் பணியாற்றும் அனைத்து அரசு ஊழியர்களின் தகவல்கள், சேவை நிர்வாகம் மற்றும் மனிதவள நிர்வாக நடவடிக்கைகள் டிஜிட்டல் தொழில்நுட்பத்தின் ஊடாக முறைப்படுத்தப்படும் எனப் பொது நிர்வாக அமைச்சு தெரிவித்துள்ளது.

பாரம்பரிய காகித அடிப்படையிலான நடைமுறைகளால் ஏற்படும் தாமதங்கள் மற்றும் திறனின்மைகளைக் குறைத்து, அரசு ஊழியர்களின் ஆட்சேர்ப்பு, உறுதிப்படுத்தல், பதவி உயர்வு, இடமாற்றம், உள்நாட்டு மற்றும் வெளிநாட்டுப் பயிற்சிகள் குறைதீர்ப்பு நிர்வாகம், செயல்திறன் மதிப்பீடு மற்றும் ஓய்வுபெறச் செய்தல் வரையிலான முழுமையான மனிதவளச் செயற்பாட்டையும் ஒரே மத்திய டிஜிட்டல் அமைப்பின் கீழ் கொண்டு வருவதே இதன் நோக்கமாகும் என அமைச்சு குறிப்பிட்டுள்ளது.

அத்துடன், இத்தகவல்களைத் தொடர்புடைய ஏனைய அரசு நிறுவனங்களுடன் நேரடியாக இணைப்பதற்கும் நடவடிக்கைகள் மேற்கொள்ளப்பட்டுள்ளதாக அமைச்சு சுட்டிக்காட்டியுள்ளது.

இக்கணினி அமைப்பின் மூலம் முழு அரசுச் சேவையிலும் வெளிப்படைத்தன்மை, திறனுறுதி மற்றும் பொறுப்புக்கூறல் உறுதி செய்யப்படுவதுடன், நிறுவன மற்றும் தேசியக் கொள்கை தீர்மானங்களை எடுக்கும் போது சரியான தரவுகளின் அடிப்படையிலான பின்னணி உருவாக்கப்படும் என்றும் அமைச்சு மேலதிகமாகத் தெரிவித்துள்ளது.