கல்முனை முஹ்யித்தீன் ஜும்ஆ பெரிய பள்ளிவாசலின் கீழ் இயங்கி வரும் முஹம்மதிய்யா பெண்கள் பகுதி நேர ஹிப்ழ் மத்ரஸாவிலிருந்து முதலாவது அல்-ஹாபிழாவாகப் பட்டம் பெற்ற முஹம்மது பஹ்மி முஹைத்தீன் பாத்திமா நஸ்கா அவர்களைக் கௌரவிக்கும் விசேட நிகழ்வானது கல்முனை முஹ்யித்தீன் ஜும்ஆ பெரிய பள்ளிவாசலினுடைய நம்பிக்கையாளர் சபையின் தலைவரான அல்-ஹாஜ் எம்.ஐ. அப்துல் அஸீஸ் தலைமையில் அண்மையில் ஆஸாத் ப்ளாஸா வரவேற்பு மண்டபத்தில் சிறப்பாக நடைபெற்றது.

பரிசுத்த அல்-குர்ஆனை முழுமையாக மனனம் செய்து, இம்மத்ரஸாவின் வரலாற்றுச் சிறப்புமிக்க முதலாவது ஹாபிழாவாக வெளியான அல்-ஹாபிழா பாத்திமா நஸ்காவின் இச்சாதனையைப் பாராட்டி, பெரிய பள்ளிவாசல் நம்பிக்கையாளர் சபையின் சார்பில் 50,000 ரூபாய் பொற்கிழியும் பாராட்டு நினைவுச் சின்னமும் வழங்கி கௌரவிக்கப்பட்டார்.

அதேவேளை, குர்ஆனை மனனம் செய்யும் புனிதப் பயணத்தில் அடுத்தடுத்த நிலைகளில் பயின்று வரும் முஹம்மது ஹனீபா நப்ரிஸா மற்றும் முஹம்மது சபீல் ஸஹ்மத் ஜினா ஆகிய மாணவிகளுக்கும் அவர்களின் கல்வி முன்னேற்றத்தைப் பாராட்டிச் சான்றிதழ்கள் வழங்கப்பட்டன.

மேலும், ஹாபிழாக்களை உருவாக்குவதில் அர்ப்பணிப்புடன் வழிகாட்டி வரும் பெண்கள் பகுதி நேர ஹிப்ழ் மத்ரஸாவின் அதிபர் என்.எப் பர்ஹத் பாதிமி மற்றும் ஆண்கள் பகுதி நேர ஹிப்ழ் மத்ரஸாவின் ஆசிரியர் அல்-ஹாபிழ் மௌலவி முஹம்மத் தன்ஸீம் கௌஸி ஆகியோருக்கும் அவர்களின் மகத்தான சேவையைப் பாராட்டிப் பொற்கிழிகள் வழங்கி கௌரவிக்கப்பட்டது.

இந்நிகழ்வில் நம்பிக்கையாளர் சபை உறுப்பினர்கள், உலமாக்கள், மத்ரஸா ஆசிரியர்கள், மாணவிகள், பெற்றோர்கள் மற்றும் சமூகப் பிரதிநிதிகள் எனப் பலரும் கலந்துகொண்டதுடன், மாணவிகளின் இஸ்லாமிய கலை நிகழ்ச்சிகளும் இடம்பெற்றன.

கல்முனை முஹ்யித்தீன் ஜும்ஆ பெரிய பள்ளிவாசலின் கீழ் ஆண்கள் மற்றும் பெண்களுக்கென முற்றிலும் இலவசமாக இப் பகுதி நேர ஹிப்ழ் வகுப்புகள் நடாத்தப்பட்டு வருவதோடு, ஆர்வமுள்ள பெற்றோர்கள் பள்ளிவாசல் காரியாலயத்தில் விண்ணப்பப் படிவங்களைப் பெற்றுத் தமது பிள்ளைகளை இணைத்துக் கொள்ள முடியும் எனப் பள்ளிவாசல் நிர்வாகம் அறிவித்துள்ளது.

பாறுக் ஷிஹான்