சவூதி பாதுகாப்பு அமைச்சகம் வெளியிட்ட அறிக்கையின்படி, சவூதி அரேபியா, அமெரிக்க மத்திய கட்டளைப் பிரிவுடன் (CENTCOM) ஒருங்கிணைந்து, ஈராக்கில் உள்ள ஈரான் ஆதரவு ஆயுதக் குழுக்கள் மீது இலக்குத் தாக்குதல்களை நடத்தியுள்ளது.

புதன்கிழமை அதிகாலையில் நடத்தப்பட்ட இந்தத் தாக்குதல்கள், "சமீபத்திய ட்ரோன் தாக்குதல்களுக்குப் பதிலடியாக" நடத்தப்பட்டதாக அந்த அறிக்கை தெரிவிக்கப்பட்டுள்ளது.

"ஈரானிய ஆதரவு பயங்கரவாதக் குழுக்களால் ஈராக்கியப் பகுதியிலிருந்து ஏவப்பட்டு நடத்தப்பட்ட, கிழக்கு மாகாணம் மற்றும் ரியாத் பகுதிகளில் உள்ள பெட்ரோலிய வசதிகளைக் குறிவைக்க முயன்ற பல ட்ரோன்களை சவூதி வான் பாதுகாப்புப் படைகள் இடைமறித்து அழித்துள்ளன" என்றும் குறிப்பிடப்பட்டுள்ளது.

"நிலைமையை அதிகரிக்க சவூதி அரேபியா விரும்பவில்லை, ஆனால் அது எதிர்கொள்ளும் எந்தவொரு ஆக்கிரமிப்புக்கும் பதிலடி கொடுக்கும் என்பதை வலியுறுத்துகிறது," எனவும் சுட்டிக்காட்டப்பட்டுள்ளது.

சவூதி அரேபியா மீதான ட்ரோன் தாக்குதல்கள் குறித்து விசாரிக்க ஈராக்கியப் பாதுகாப்பு அமைப்புகளுக்கு உத்தரவிட்ட சில நாட்களுக்குப் பிறகு, ஈராக்கியப் பிரதமர் அலி அல்-ஜைதி வியாழக்கிழமை சவூதி அரேபியாவுக்குப் பயணம் மேற்கொள்வார் என்று எதிர்பார்க்கப்படுகின்றது.

"சகோதர அல்லது நட்பு நாடுகளை இலக்காகக் கொண்ட எந்தவொரு தாக்குதலுக்கும் ஈராக்கின் நிலப்பரப்பு ஒரு பாதையாகவோ அல்லது தாக்குதல் தொடங்கும் இடமாகவோ பயன்படுத்தப்படுவதைத் தடுப்பதில் ஈராக் உறுதியாக உள்ளது," என்று ஈராக்கிய இராணுவம் திங்களன்று வெளியிட்ட ஓர் அறிக்கையில் தெரிவித்துள்ளது.

ஈரான் ஆதரவு ஆயுதக் குழுக்களின் கூட்டமைப்பான ஈராக்கின் இஸ்லாமிய எதிர்ப்பு இயக்கம், இந்தத் தாக்குதல்களில் தங்களுக்கு எந்தப் பங்கும் இல்லை என்று மறுத்ததுடன், சவூதியின் கூற்றுகள் "கற்பனையானவை" என்றும், "சவூதியின் எந்தவொரு முட்டாள்தனமான செயலுக்கும் கடுமையான பதிலடி கொடுக்கப்படும்" என்றும் கூறியுள்ளது.