வெளிநாடுகளில் வசிக்கும் இலங்கைப் பிரஜைகள் நாட்டில் சாரதி அனுமதிப்பத்திரங்களைப் பெற்றுக்கொள்வது மற்றும் பயன்படுத்துவது தொடர்பான வேலைத்திட்டம் குறித்து போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க பாராளுமன்றத்தில் விசேட விளக்கமளிப்பொன்றை மேற்கொண்டார்.

இலங்கைப் பிரஜை ஒருவரிடம் ஏற்கனவே இலங்கையில் வழங்கப்பட்ட சாரதி அனுமதிப்பத்திரம் இருக்குமாயின், அவர் வெளிநாட்டிலிருந்து மீண்டும் நாட்டிற்கு வருகை தரும் சந்தர்ப்பங்களில் அந்த அனுமதிப்பத்திரத்தைப் பயன்படுத்தி எவ்வித தடையுமின்றி சட்டப்பூர்வமாக வாகனங்களைச் செலுத்த முடியும் என அமைச்சர் சுட்டிக்காட்டினார்.

அத்துடன், வெளிநாட்டில் இருக்கும்போது இலங்கைப் பிரஜை ஒருவர் தனது இலங்கைச் சாரதி அனுமதிப்பத்திரத்தை குறித்த வெளிநாட்டில் ஒப்படைத்துவிட்டு அந்நாட்டின் சாரதி அனுமதிப்பத்திரத்தைப் பெற்றிருந்தால், அவர் மீண்டும் நாட்டிற்கு வந்த பின்னர் உரிய ஆவணங்களைச் சமர்ப்பித்துத் தனது சாரதி அனுமதிப்பத்திரத்தை மீண்டும் பெற்றுக்கொள்ள முடியும் என்றும் அமைச்சர் குறிப்பிட்டார்.

ஒருவேளை வெளிநாட்டில் வாழும் இலங்கையர் ஒருவரின் உள்நாட்டுச் சாரதி அனுமதிப்பத்திரம் தொலைந்துபோயிருந்தால், சாதாரண நடைமுறைக்கு அமைய பொலிஸ் நிலையத்தில் முறைப்பாடு செய்து புதிய அனுமதிப்பத்திரத்தை தயாரித்துக் கொள்வதற்குச் சந்தர்ப்பம் வழங்கப்படும் என்றும் அமைச்சர் கூறினார்.

இதற்கமைய, இலங்கைப் பிரஜைகள் தேவையின்றி மேலதிகப் பணத்தைச் செலவழிக்காமல், தங்களது சட்டப்பூர்வ குடியுரிமையின் கீழ் சாரதி அனுமதிப்பத்திர வசதிகளைப் பெற்றுக்கொள்ள முடியும் என அமைச்சர் பிமல் ரத்நாயக்க மேலும் வலியுறுத்தினார்.