இஸ்ரேல் மற்றும் லெபனான் இடையேயான மோதலைக் குறைக்கும் முக்கிய முன்னேற்றமாக, 10 நாள் காலத்திற்கான தற்காலிக போர்நிறுத்த ஒப்பந்தம் தற்போது அமுலுக்கு வந்துள்ளது. இந்த ஒப்பந்தத்தை அமெரிக்க ஜனாதிபதி Donald Trump அதிகாரப்பூர்வமாக அறிவித்துள்ளார்.

லெபனான் ஜனாதிபதி Joseph Aoun மற்றும் இஸ்ரேல் பிரதமர் Benjamin Netanyahu ஆகியோருடன் நடைபெற்ற ஆக்கப்பூர்வமான பேச்சுவார்த்தைகளைத் தொடர்ந்து இந்த உடன்பாடு எட்டப்பட்டதாக தெரிவிக்கப்பட்டுள்ளது.

இந்த போர்நிறுத்தம் இலங்கை நேரப்படி இன்று அதிகாலை 2.30 மணி முதல் அமுலுக்கு வந்துள்ளதுடன், கிழக்கு நேரப்படி (EST) மாலை 5 மணிக்கு தொடங்கியதாகவும் குறிப்பிடப்பட்டுள்ளது. இரு தரப்பினரும் இந்த ஒப்பந்தத்தை வரவேற்றுள்ள நிலையில், இது அமைதிக்கான “வரலாற்றுச் சிறப்புமிக்க வாய்ப்பு” எனவும் மதிப்பிடப்பட்டுள்ளது.

அமெரிக்காவின் விளக்கப்படி, இந்த போர்நிறுத்தம் இஸ்ரேலின் ‘நல்லெண்ணச் சமிக்ஞை’ எனக் கருதப்படுவதுடன், இரு நாடுகளும் நேரடி பேச்சுவார்த்தைகளை தொடர ஒப்புக்கொண்டுள்ளன. பேச்சுவார்த்தைகளில் முன்னேற்றம் ஏற்பட்டால், இரு தரப்பின் சம்மதத்துடன் போர்நிறுத்த காலம் நீட்டிக்கப்படவும் வாய்ப்புள்ளது.

இதற்கிடையில், ஈரான் ஆதரவு அமைப்பான Hezbollah, சில நிபந்தனைகளுடன் இந்த ஒப்பந்தத்தை ஏற்றுக்கொண்டதாக தெரிவிக்கப்பட்டுள்ளது. போர்நிறுத்தத்திற்கு முன்பாக, அந்த அமைப்பு இஸ்ரேலியப் படைகளுடன் தாக்குதல்களில் ஈடுபட்டதாகவும் தகவல்கள் வெளியாகியுள்ளன.

போர்நிறுத்தம் அமுலில் இருந்தாலும், அவசரமான அச்சுறுத்தல்களுக்கு எதிராக தற்காப்பு நடவடிக்கைகளை மேற்கொள்ளும் உரிமை இஸ்ரேலுக்கு இருப்பதாக அமெரிக்கா வலியுறுத்தியுள்ளது. அதேவேளை, ஹிஸ்புல்லா உள்ளிட்ட ஆயுதக் குழுக்களை கட்டுப்படுத்த லெபனான் அரசு நடவடிக்கை எடுக்க வேண்டும் என்பதும் குறிப்பிடப்பட்டுள்ளது.

மேலும், லெபனானின் இறையாண்மை மற்றும் தேசிய பாதுகாப்பிற்கான முழுப் பொறுப்பும் அந்த நாட்டின் அரசாங்கத்திற்கே உண்டு என உறுதி செய்யப்பட்டுள்ளது. எஞ்சியுள்ள பிரச்சினைகளை தீர்க்கும் நோக்கில், அமெரிக்காவின் முன்னிலையில் இரு நாடுகளும் தொடர்ந்தும் பேச்சுவார்த்தைகளை நடத்த ஒப்புக்கொண்டுள்ளன.