நுவரெலியா மாவட்டத்தில், மரக்கறி விலைகளில் ஏற்பட்டுள்ள வீழ்ச்சிக்கான காரணமாக, பெரும்பாதிப்பானது எதிர்கொண்டுள்ளதாக, விவசாயிகள் கவலைத் தெரிவிக்கின்றனர்.

கடந்த இரண்டு மாதங்களுக்கு மேலாக நீடித்துவருகின்ற குறித்த விலை வீழ்ச்சியினால், பயிர்ச்செய்கைக்கு, செலவு செய்த பணத்தைக்கூட மீளப்பெற முடியாத துர்ப்பாக்கிய நிலைக்குத் தள்ளப்பட்டுள்ளதாகவும், விவசாயிகள் கவலைத் தெரிவிக்கின்றனர்.

இது தொடர்பில் மேலும் கூறியுள்ள அவர்கள்,

நுவரெலியா மாவட்டத்துக்குட்பட்டப் பகுதிகளில், லீக்ஸ், கரட், மற்றும் பீட்ரூட் ஆகிய மரக்கறிகளே, அதிகம் பயிரிடப்படுகின்றன. இவ்வாறு பயிரடப்படும் மரக்கறிகள் லீக்ஸ்(120)கரட்,(150), பீட்ரூட் (160) மிகக் குறைந்த விலைக்கே விவசாயிகளிடம் இருந்து கொள்வனவு செய்யப்படுகின்றன.

இதனால், பயிர்களுக்கு செலவு செய்யும் உற்பத்திக்கான செலவினத்தைகூட பெறக்கூட முடியாத துர்ப்பாக்கிய நிலைக்கு தள்ளப்பட்டுள்ளோம்.

லீக்ஸ் கன்று ஒன்றினுடைய விலை ஒரு ரூபாயாகும். அதனை நடுகை செய்து பராமரிக்க பத்து ரூபாய்க்கு மேலதிகமாக செலவளிக்க வேண்டியுள்ள நிலையில், சந்தையில் ஒரு கிலோகிராம் கோவா, 6 ரூபாய்க்கு விற்பனை செய்யப்படுகின்றது. இது எமக்கு பெரும் பாதிப்பாக அமைந்துள்ளது.

இதேவேளை, கடந்த வருடத்தோடு, ஒப்பிடுகையில், இவ்வருடம் மரக்கறிகளினுடைய விலையானது சடுதியாக குறைந்துள்ளது.

எனவே, விவசாயத்துக்கு முக்கியத்துவம் வழங்கிவரும் இவ் அரசாங்கம், நுவரெலியா மற்றும் வெலிமடை போன்ற பகுதிகளினுடைய விவசாயிகள் மீது, கரிசனைக்காட்ட வேண்டும்” எனவும் கோரியுள்ளனர்.

வி.தீபன்ராஜ்