மத்திய கிழக்கு பிராந்தியத்தில் ஏற்பட்டுள்ள போர் சூழ்நிலை காரணமாக, கட்டுநாயக்க விமான நிலையத்தில் இருந்து புறப்படவிருந்த 115 விமானங்கள் இன்று (02) இரவு 9.50 மணி வரை இரத்து செய்யப்பட்டுள்ளதாகவும், அந்தப் பிராந்தியத்தில் உள்ள நாடுகள் தங்கள் பாதுகாப்பிற்காக தங்கள் வான்வெளிகளை மூடிவிட்டதாகவும் கட்டுநாயக்க விமான நிலையப் பொறுப்பதிகாரி தெரிவித்தார்.

அதன்படி, மத்திய கிழக்குப் பிராந்தியத்தில் உள்ள நாடுகளில் இருந்து கட்டுநாயக்க விமான நிலையத்திற்கு வரவிருந்த இலங்கை மற்றும் பிற வெளிநாட்டு விமான நிறுவனங்களின் 55 விமானங்களும், கட்டுநாயக்க விமான நிலையத்திலிருந்து அந்தப் குறித்த பிராந்தியத்திற்குப் புறப்படவிருந்த 60 விமானங்களும் இரத்து செய்யப்பட்டுள்ளன.

அதேபோல், 28 ஆம் திகதி மதியம் கட்டுநாயக்க விமான நிலையத்திலிருந்து மத்திய கிழக்கு நோக்கிப் புறப்பட்ட இரண்டு ஃபிட்ஸ் ஏர் மற்றும் ஏர் அரேபியா விமானங்களும் அன்று பிற்பகல் அந்தப் பிராந்தியத்திற்குள் நுழைய முடியாமல் கட்டுநாயக்க விமான நிலையத்திற்குத் திரும்பின. ஸ்ரீலங்கன் ஏர்லைன்ஸின் கார்ப்பரேட் கம்யூனிகேஷன்ஸ் தலைவர் தீபால் பெரேரா கூறுகையில், மத்திய கிழக்குப் பிராந்தியத்தில் எந்த ஸ்ரீலங்கன் ஏர்லைன்ஸ் விமானமும் தடுத்து வைக்கப்படவில்லை என்றும், இந்தப் பின்னணியில் நாட்டிற்குள் நுழைய முடியவில்லை என்றும்குறிப்பிட்டுள்ளார்.

அத்தோடு, மத்திய கிழக்கு பிராந்தியத்தில் உள்ள நாடுகளுக்கு தங்கள் இலக்காக விமானத்தில் பயணிக்கும் பயணிகளும், அந்தப் பிராந்தியம் வழியாக பிற நாடுகளுக்கு விமானத்தில் பயணிக்கும் பயணிகளும் கட்டுநாயக்க விமான நிலையத்திற்கு வருவதற்கு முன்பு தங்கள் பயண முகவர்களிடம் விசாரிக்க வேண்டும் என்று கட்டுநாயக்க விமான நிலையப் பொறுப்பதிகாரி மேலும் தெரிவித்தார்.

விசா காலம் காலாவதியாகி தற்போது நாட்டில் தங்கியுள்ள வெளிநாட்டு சுற்றுலாப் பயணிகளுக்கான விசா காலத்தை 7 நாட்கள் நீட்டிக்க குடிவரவு மற்றும் குடியகல்வுத் துறை தேவையான நடவடிக்கைகளினை எடுத்துள்ளதாகவும் தெரிவிக்கப்படுகின்றது.