Hizam A Bawa 
உயிரிழந்த வர்த்தகர் தினேஷ் ஷாப்டரின் உடல் பாகங்கள் விசாரணைக்காக எடுத்துச் செல்லப்பட்டிருந்தால் அவற்றை பாதுகாப்பாக வைக்க நடவடிக்கை எடுக்குமாறு கொழும்பு நீதவான் நீதிமன்றம் அரசாங்க மரண விசாரணை அதிகாரி மற்றும் கொழும்பு பிரதான சட்ட வைத்திய அதிகாரி ஆகியோருக்கு இன்று உத்தரவிட்டுள்ளது.
மேலும், தினேஷ் ஷாப்டரின் குடும்பத்தின் சார்பாக வாதிட்ட ஜனாதிபதி சட்டத்தரணி அனுஜா பிரேமரத்ன நீதிமன்றில் விடுத்த கோரிக்கையை பரிசீலித்த கொழும்பு மேலதிக நீதவான் ரஜீந்திர ஜயசூரிய இந்த உத்தரவை பிறப்பித்துள்ளார்.
இதன்படி, நீதிமன்றில் தமது பக்க நியாயங்களை முன்வைத்த ஜனாதிபதியின் சட்டத்தரணி அனுஜ பிரேமரத்ன, தினேஷ் ஷாப்டர் வைத்தியசாலையில் அனுமதிக்கப்பட்ட போது அவருக்கு இரண்டு ஸ்கேன் மற்றும் சிகிச்சைகள் மேற்கொள்ளப்பட்டமை உண்மைகள் தெரியவந்துள்ளதாக தெரிவித்தார்.
அத்தோடு, அந்த சிகிச்சைகள் தொடர்பான அனைத்து அறிக்கைகளையும் நீதிமன்றத்திற்கு வரவழைக்க உத்தரவு பிறப்பிக்குமாறும் ஜனாதிபதியின் சட்டத்தரணி நீதிமன்றத்திடம் கோரியுள்ளார்.
மேலும், இந்தக் கோரிக்கையை ஏற்றுக்கொண்ட மேலதிக நீதவான், உயிரிழந்த தினேஷ் ஷாப்டரின் சிகிச்சை தொடர்பான ஆவணங்களை நீதிமன்றில் முன்னிலைப்படுத்துமாறு கொழும்பு தேசிய வைத்தியசாலையின் பணிப்பாளரிடம் உத்தரவு பிறப்பித்துள்ளார்.
அத்தோடு, மற்றுமொரு கோரிக்கையை முன்வைத்த ஜனாதிபதி சட்டத்தரணி, தினேஸ் ஷாப்டரின் பிரேத பரிசோதனையின் போதும் அதற்கு முன்னர் கொழும்பு சட்ட வைத்திய அதிகாரி அலுவலக அதிகாரி மற்றும் பொரளை பொலிஸ் உத்தியோகத்தர்கள் புகைப்படம் எடுத்ததாக குறிப்பிட்டார்.
மேலும், புகைப்படங்களை குறுந்தகட்டில் இணைத்து நீதிமன்றில் முன்னிலைப்படுத்துமாறும்குறித்த திணைக்களங்களுக்கு உத்தரவு பிறப்பிக்குமாறும் ஜனாதிபதி சட்டத்தரணி கோரியுள்ளார்.
அத்தோடு, இந்தக் கோரிக்கையை ஏற்றுக்கொண்ட கூடுதல் மாஜிஸ்திரேட், சம்பந்தப்பட்ட புகைப்படங்கள் அல்லது வீடியோக்களை குறுந்தகட்டில் அல்லது USBயில் சேர்த்து நீதிமன்றத்தில் சமர்ப்பிக்குமாறு அந்த நிறுவனங்களுக்கு உத்தரவிட்டார்.
இதேவேளை, விசாரணைகளை முன்னெடுத்து வரும் குற்றப் புலனாய்வுத் திணைக்கள அதிகாரிகள், நீதிமன்றத்தில் உண்மைகளை முன்வைத்து, குற்றம் நடந்த இடத்தில் வெளிநாட்டு உயிரியல் மாதிரி கண்டுபிடிக்கப்பட்டதா, அதை ஒப்பிட்டுப் பார்க்கப்பட்டுள்ளதா என்பதை விசாரிக்க உத்தரவிடுமாறு மேலும் கேட்டுக்கொண்டார்.
இதன்படி, கோரிக்கையை ஏற்றுக்கொண்ட மாஜிஸ்திரேட், சம்பந்தப்பட்ட உயிரியல் மாதிரிகள் மற்றும் பரிசோதனைக்கு உட்படுத்தப்பட்ட நபர்களை, அரசின் பரிசோதனைத் திணைக்களத்திற்கு அனுப்பி, விசாரணைக்கு தேவையான உத்தரவை பிறப்பித்ததோடு இச்சம்பவம் தொடர்பான வழக்கை வரும் 17ஆம் திகதி மீண்டும் விசாரிக்க உத்தரவிடப்பட்டது.
